Projektet e përkrahura nga Ministria e Kulturës për vitin 2020

Ministria e Kulturës e R. së Maqedonisë së Veriut, në programin vjetor të projekteve me interes nacional në kulturë, sivjet ka përkrahur në mënyrë korrekte gjashtë projekte të rëndësishme të Klubit të Shkrimtarëve “JEHONA Е KARADAKUT” nga Kumanova, për çka edhe i falënderojmë publikisht.

Sigurisht që në këto vlerësime pozitive, anëtarët e komisioneve, si dhe përgjegjësit e Ministrisë, e kanë pasur parasysh seriozitetin e punës sonë ndër vite, duke e çmuar këtë Klub si një ndër organizimet e para të shoqërisë demokratike shqiptare, si botues i revistës së parë të pavarur letrare shqipe në Maqedoni “Doruntina”, si dhe bartës i manifestimit tradicional kulturor „Takimet Poetike të Karadakut”.

Projektet e përkrahura nga Ministria e Kulturës e që do të realizohen brenda vitit 2020, janë:

a) Projektet e letërsisë dhe veprimtarisë botuese:

  1. Manifestimi „TAKIMET POETIKE TË KARADAKUT-2020″ (edicioni i 28-të)
  2. Revista „DORUNTINA“, dy numra (58-59)
  3. Libri “KULLA JONË “ (Përmbledhje e poezisë kumanovare shqipe)
  4. Libri “PËRTEJ HESHTJES…” (poezi) – Selajdin Shabani
  5. Libri “AFORIZMA PRAGMATIKË” – Sunaj Raimi.

b) Projekt në fushën e veprimtarisë ndërkombëtare:

  1. “LETËRSIA JONË NË MESIN E BASHKATDHETARËVE” (Qendra Kulturore në Stamboll).

Kësaj radhe nuk ka gjetur përkrahje projekti interdisiplinar: „PENA IME -2020“ (edicioni i tretë), i cili për shkak të imazhit që filloi të ndërtojë vit pas viti, sidomos në mesin e artistëve të rinj, gjithsesi do të mbahet, dhe për të do të kërkohen forma tjera të mbështetjes, me qëllim të ruajtjes së kontinuitetit.

 

 

Komente