Xhevat Xh. Latifi
TRIPTIK PËR KUMANOVËN
( Udha e Kumnovës )
Në të dalë prej shtëpisë sime në udhëkryq
Te Kroi i Lekës
Nana e Skifter Arifit, hapëron drejt perëndimit të diellit
Është rruga e Sllupçanit thotë, dhe nuk habitet me përmend Udhën e Kumnovës
Dhe këtë rrugë ajo e bënë çdo ditë
Çdo lindje dielli, çdo festë dhe natën derisa t’i futet gjumit të thellë
Këtë rrugë e ka bërë edhe Idriz Seferi
Në vjeshtën e fundit kur iu futën në këmbë Shkupit!
Te Majat e zeza kësulëbardhat shqiponja në qiell
Atje një nënë që nga pritja bëhet gurë.
( Marrëveshja e Kumanovës )
Njëqind vjet pas golgotës së Kumanovës
Letrat e Trockit, shtrohen si relikte në tavolinë
Një gotë dhe një shishe mbeten të paprekura
Gjenerali Michael Jackson, e nxjerr nga ëndrra gjeneralin Pavkoviq
Ai kafshon buzën me një laps me ngjyrë të kuqe
Bëhet të jetë i dehur, bëhet se po këndon këngën…
Është vonë Janko, të ikim…
Më pas një histori e re nisë të shkruhet
( Orën letrare)
‘E di se unë kam bërë shumë faj’
Dëgjohet baladë roku e Sunaj Raimit
E Azem Shkreli, shkruan të ketë qarë për Arbërinë
Me faj e me vaj, thua:
Sallë dashuria dhe dielli këtë vend e kanë shpëtuar
Sall dashuria dhe dielli këtë vend nga mallkimi e ruajnë
Është sofër Zeusi për rreth me nimfa e zana jeshile dhe blu..
Një ditë keni për të kuptuar se këtë vend e deshti Zoti
Njësoj siç e dua unë e siç e donë ti!
—————————–
P.S. Kjo poezi u vlerësua me Çmimin e Parë Poetik “Fadil Bekteshi”, më 11 mars 2019, në Orën e madhe letrare të manifestimit “Takimet Poetike të Karadakut” – Kumanovë
