Për ne

Klubi i Shkrimtarëve “Jehona e Karadakut” nga Kumanova, është nga të parat shoqata joqeveritare shqiptare në Maqedoni, e cila pandërprerë po funksionon 25  vjet me radhë.

Konkretisht, më 28 qershor 1992, një grup artdashësish, të gdhendur me idenë fisnike të zhvillimit e përparimit kulturor të kësaj shoqërie, të porsadalë nga sistemi i njëmendimësisë, themeluan Klubin e Shkrimtarëve Shqiptarë të Kumanovës, i cili më vonë u pagëzua “Jehona e Karadakut”. Në krye të klubit u vu shkrimtari Fadil Bekteshi, për të renditur më pas një varg veprash dhe suksesesh.

Menjëherë pas klubit, u themelua edhe revista e parë e pavarur shqiptare në Maqedoni për letërsi, shkencë dhe kulturë “Doruntina”, dhe nisi rrugën manifestimi tradicional letrar “Takimet Poetike të Karadakut”, i cili nga viti në vit krijoi një reputacion të respektuar në komunitetin tonë kulturor.

Më pas Klubi i Shkrimtarëve “Jehona e Karadakut” u drejtua nga shkrimtarët: Bejtush Memeti (1998-2002), Burhanedin Xhemaili (2002-2012), kurse më 29 janar 2012 u zgjodh kryetar Sevdail Demiri, i cili vazhdon të drejtojë klubin në mandatin e dytë.

Festivali i poezisë shqipe në Kumanovë, “Takimet Poetike të Karadakut”, tradicionalisht, çdo 11 mars mbledh poetë të shquar nga të gjitha trevat shqiptare, për të bashkëbiseduar e komuni-kuar mes vete, dhe për të kujtuar veprën e sakrificën sublime të rinisë studentore të Kosovës dhe gjithë dëshmorëve të kombit.

Në kuadër të këtij klubi, përpos revistës “Doruntina”, për çdo vit botohen libra të ndryshëm të sferës së letërsisë dhe kulturës shqiptare.

* * * * *
Kryetar: Sevdail Demiri
Nënkryetarë: Sunaj Raimi, Fatos Rushiti
Sekretar: Selajdin Shabani
Kryeredaktor i revistës “Doruntina”:

Burhanedin Xhemaili