Kumanovë, 06.12.2013 – Sot në Kumanovë, në organizim të Klubit të Shkrimtarëve “Jehona e Karadakut”, para një numri të madh të dashamirëve të artit, letërsisë dhe kulturës shqiptare, u shënua 40 vjetori i botimit të veprave të para letrare të autorit Nehas Sopaj. Bëhet fjalë për përmbledhjet poetike “Këngët e blerta” në Shkup dhe “Algjet” në Prishtinë (1973), të cilat u vlerësuan lartë nga kritika letrare e kohës, duke u prezantuar nëpër antologji të ndryshme të poezisë në vend dhe jashtë.
Fillimisht, kryetari i klubit, Sevdail Demiri, theksoi se Nehas Sopaj është një nga emrat më të veçantë të letërsisë shqipe, i cili gjatë këtyre 40 viteve të veprimtarisë letrare, na ka ofruar rreth 40 tituj të veprave nga zhanre të ndryshme, duke filluar nga poezia, tregimet, novelat, romanet, përkthimet, librat shkollore dhe studime letrare.
Poeti Fatos Rushiti, para publikut lexoi biografinë e autorit dhe deklamoi vargje nga poezia e zgjedhur bashkëkohore e Sopajt.
Më tej, shkrimtari Burhanedin Xhemaili, paraqiti një vështrim kritik më të hollësishëm për veprat letrare të Nehas Sopajt. “Autori me tërë këtë opus letrar dhe me këto përzgjedhje shënon kulmin e arritjes estetike në vlerat e poezisë shqipe në përgjithësi, dhe në krijimin e individualitetit të tij letrar në veçanti, si botë poetike më vete që dallon prej krijuesve të tjerë të afirmuar”, u shpreh Xhemaili.
Më pas, autori Nehas Sopaj, shprehu falënderimet e tij për nderimin e bërë, duke rikujtuar kohën kur si 19 vjeçar kishte shpërthyer bota e tij artistike, me botimin e dy përmbledhjeve të lartpërmendura, të cilat atë e kishin radhitur në mesin e poetëve më premtues të kohës.
Në emër të kryesisë së Klubit të Shkrimtarëve “Jehona e Karadakut” nga Kumanova, kryetari Sevdail Demiri, ndau Mirënjohje për Prof.Dr. Nehas Sopaj, poet, shkrimtar, pedagog e studiues i letërsisë, me rastin e 40 vjetorit të botimit të veprave të para autoriale.
Manifestimin e përshëndeti edhe shkrimtari nga Shkupi Fadil Curri, i cili e vlerësoi lartë veprën letrare të Sopajt, duke i uruar shëndet dhe jetë të gjatë, me dëshirën që edhe shumë vepra tjera letrare dhe shkencore t’ia dhurojë letërsisë shqiptare.

Shërbimi për informim

Kumanovë, 23.11.2013  – Sot në lokalet e Gjimnazit “Sami Frashëri” në Kumanovë, u bë shpallja publike e rezultateve të konkursit letrar në poezi, i shpallur një muaj më parë për nxënësit e shkollave të mesme shqipe të rajonit të Kumanovës.
Juria letrare e Klubit të Shkrimtarëve “Jehona e Karadakut”-Kumanovë, e formuar për realizimin e këtij konkursi me temë të lirë, në përbërje: Fatos Rushiti, Bejtush Memeti dhe Burhanedin Xhemaili, pas leximit të kujdesshëm të të gjitha poezive të arritura në postën elektronike të klubit, ishin përcaktuar për këto tre punime si më të mira:
Vendi i parë: Arta Selmani, nxënëse e Gjimnazit “Sami Frashëri”-Kumanovë, për poezinë “28 Nëntori”;
Vendi i dytë: Shukrane Junuzi, nxënëse e SHMK “Ismet Jashari”-Likovë, për poezinë “Bonjaku i tij”; dhe
Vendi i tretë: Kujtesa Xheladini, nxënëse e SHMTK “Nace Bugjoni”-Kumanovë, për poezinë “Të vdekur, por të gjallë”.
Juria vlerësoi se më tepër punime për këtë konkurs, si në numër, poashtu edhe në cilësi, kishte nga nxënësit e Gjimnazit “Sami Frashëri”.
Shpërblimet në vlerë 7000 denarë, 5000 denarë dhe 3000 denarë, mirënjohjet dhe librat, u ndanë nga ana e kryetarit të Klubit të Shkrimtarëve, “Jehona e Karadakut”-Kumanovë, dr. Sevdail Demiri. Poashtu, mirënjohje morën edhe shkollat të cilat ndihmuan në realizimin e aktivitetit.
Ky ishte viti i parë që u realizua me sukses ky konkurs letrar, i mbështetur nga komuna e Kumanovës. Konkursi në fjalë, në të ardhmen synon të bëhet tradicional, për të nxitur dhe motivuar gjeneratat e reja të merren më tepër me aktivitete letrare-artistike dhe kulturore.

Nga komisioni për informim

Poezia që zuri vendin e parë (I)

28 NËNTORI

Shqipëri po të qesh fytyra,
Një vranësirë ke në vetull
Shqiponjës në flamur i buzëqesh liria,
Trupi i copëtuar, dhembje e mbetur.

Heeej! Shqipëri nënë e plagosur
Ty që të parin Zoti të solli në tokë,
Kaluan shekuj në këtë botë të pluhurosur
Prapë gjallë ke ngel dhe je bërë e fortë.

28 Nëntor shkruar me shkronja gjaku
Shkruar me shkronja qe tokës ia dhuroi Zoti
Çdo shkronjë me aromë zambaku
Çdo shkronjë e larë me pika loti.

Gjithmonë Shqipëri ty të kanë munduar
Që bijtë të jenë në sherr dhe të përçarë
Me asnjë fe dot nuk të kanë ngatërruar
Sepse ti gjithmonë ke dalë e larë.

E di Shqipëri vranësirën ke në vetull
Shumë shpejtë vranësira ka me t’u tretur
Shumë shpejt dy plagët do të shërohen,
Shqiptarët bashke në një shtet do të bashkohen.

ARTA SELMANI,
Kl.l-8, Gjimnazi “Sami Frashëri”-Kumanovë

Poezia që zuri vendin e dytë (II)

BONJAKU I TIJ

Si qëndron loti në syrin tim
pyete vetëm shpirtin tim.
Si më ngrinë gjaku në venë
kur kujtoj atë që s’vjen.

Babi im i dashur
unë s’u ngopa me ty
por ngopem me erën tënde
që e thërras liri.

Si s’u erdhi keq atyre
si s’menduan për mua
që unë sot të rroj vetëm
s’më bjen në krah asnjë mua.

Unë po rritem ngadalë
do bëhem trim si ti
ti quhesh legjendë
kurse unë i biri i tij.

SHUKRANE JUNUZI
SHMK “Ismet Jashari”-Likovë

Poezia që zuri vendin e tretë (III)

TË VDEKUR, POR TË GJALLË

Nga mosqenia e të gjallëve në këtë botë
Ne kuptojmë si ende rrojmë në këtë tokë,
Në këtë tokë me gjak të shtruar
Që të duket si e praruar.

Nga kjo tokë erdhën
E në të shkuan,
Por të gjallë mbetën,
as nga dheu nuk u tretën.

Anëpëranë Arbnisë dëgjohej
Për liri kushtrimi,
Nga të gjallët e pavdekshëm
Pa ju trembur syri.

Në këtë tokë arbnore rrojmë
Se për të u flijuam,
Me djersë e me shpirt,
Popullin arbnor për ta ndrit.

KUJTESË XHELADINI
Kl. IV-7, SHMTK “Nace Bugjoni”-Kumanovë

Më 21 shtator 2013 në Stubëll e Epërme të Vitisë (Kosovë), u mbajt manifestimit tradicional kulturor e shkencor mbarëkombëtar “Takimet e Dom Mikelit” (edicioni i XXIV), në organizim të Shoqatës Kulturore Shkencore nga Stublla dhe Qendra për Studime Albanologjike në Tiranë.
Në kuadër të Orës së madhe letrare “Agim Ramadani”, ku u paraqitën afër 40 poetë nga të gjitha trevat shqiptare, çmimi i tretë i takoi Sevdail Demirit nga Kumanova, vendi i dytë poetes Shefqete Gosalci nga Prishtina, ndërsa çmimi i parë poetit Abdullah Konushevci nga Prishtina.
Juria ishte e përbërë nga studiuesit Sadri Fetiu, Nuhi Ismajli dhe Fehmi Ajvazi.
Përpos Sevdail Demirit, nga Klubi i Shkrimtarëve “Jehona e Karadakut”-Kumanovë, në këtë manifestim morën pjesë edhe poetët: Bejtush Memeti, Burhanedin Xhemaili dhe Fatos Rushiti…

“Klubi Shqiptar i Kumanovës (1909) dhe Jashar Erebara”, ishte tema e tribunës shkencore të mbajtur sot në Kumanovë nga studiuesja franceze, Evelyn Noygues, e cila këto ditë po qëndron në Maqedoni.

Fillimisht, Sevdail Demiri, kryetar i KSH “Jehona e Karadakut”-Kumanovë, dha një historik të shkurtër të Klubit Shqiptar të Kumanovës, të cilin e themeloi në janar të vitit 1909 rilindësi Jashar Erebara. Në kuadër të këtij klubi u hap edhe shkolla shqipe e natës, në kohën kur as në qendrat më të mëdha nuk ishte arritur të hapeshin shkolla të tilla. Në të mësonin 20-30 e deri më 90 nxënës shqiptarë. Në vitin 1911 nga kjo shkollë u botua edhe Abeceja shqipe e Kumanvës, e cila ishte e para e këtij lloji në këto troje, informojnë nga ITSHKSH.

Më tej drejtori i ITSHKSH-së, Shefqet Zekolli, duke e prezantuar mysafiren nga Parisi, theksoi se këto ditë tek ne po qëndron studiuesja franceze Evelin Noygues, e cila gjatë kohë është marrë me problemin shqiptar, dhe veçanërisht me jetën dhe veprën e atdhetarit Jashar Erebara. Ai tha se prezantime të tilla kishim në Tetovë, Dibër, sot në Kumanovë dhe në fund në Shkup.

Më pas, albanologia Noygues mbajti ligjëratën për figurën markante të rilindësit Jashar Erebara, me prejardhje nga Podujeva, i lindur në Mostar dhe i rritur në Dibër, ku ishte adoptuar në familjen Erebara. Më tej, Noygues theksoi se Erebara nga pushteti osman u internua në Kumanovë në vitin 1908, ku punoi si nëpunës statistike. Në Kumanovë ai bëri punë të mëdha, duke vënë themelet e arsimit shqip në këto treva. Më tej tregoi rrjedhën e ngjarjeve në vijim dhe kontributin e madh të Jashar Erebarës si pjesëmarrës në Kongresin e Manastirit, në shpalljen e pavarësisë së Shqipërisë, si deputet i Dibrës, etj.

Referimi i studiueses Nyeges, u dëgjua me shumë interes nga një numër i madh i kumanovarëve, të cilët në fund u kyçën në temë me komentet dhe sugjerimet e tyre, që në të ardhmen të bëhet edhe më shumë për ndriçimin e kësaj figure komplekse historike.

Paraprakisht, delegacioni i studiuesve të ITSHKSH-së dhe mysafirja Nyeges, vizituan edhe Shkollën fillore dhe SHASH “Naim Frashëri” në Kumanovë dhe Fakultetin e Administratë-biznesit të USHT-së në Kumanovë, duke parë evoluimin e shkollës shqipe në këtë rajon, nga një shkollë joformale 114 vjet më parë, e deri në universitet në ditët e sotme.

Në ditën e fundit të vizitës, të premten në sallën e ITSHKSH-së në Shkup, studiuesja Nyeges prej ora 11.00 do të merr pjesë në promovimin e librit të studiueses Bukurije Mustafa rreth tipareve gjuhësore të gazetës ‘Shkupi’.