Poezi nga Burhanedin Xhemaili

Kohë e shkuar

Një fjalë e shkruar

në xhamin e thyer të dritares

me shikim nga dielli

rrinte në vetmi të harruar,

e ballkoni i mbuluar

me rrjetin e merimangës

na përkujtonte mosbesimin

e kohës së shkuar…

Në këtë heshtje të humbur

zukama e mizave të tërbuara

irritonte macet e mëhallës

që luanin me topin e shpuar

tangon e dëshpërimit,

e nuk ishte vjeshtë mërzie

as njeri s’ kishte vdekur,

por heshtja matej me hijen e vetë

gjersa drita ia dha këngës…

Ҫaste vetmie…

Nata e matur

me vetminë e fjetur

shkundi retë e zeza

mbi xhamin e dritares

dhe zgjoi heshtjen time

t’plandosur,

gjersa shikoja portretin e kthyer

n’albumin e kujtimeve të zgjedhura

që m’ kthenin në kohën e shkuar,

e zëri i humbur

brenda labirinteve të harresës

m’ lëvronte shpirtin

me pyetjet e pareshtura

e nuk më çelte portat e mundësive

të mbyllura me rraptimë shiu…

Nëntor, 2012

Ёndërr

1. Nga ndjenja në ndjenjë

kujtoj ëndrrat dhe enigmat

brenda ëndrrës, çelës i portave

dhe mrekullive magjike,

për të kapur ritmin e jetës

me vështirësitë e imponuara

dhe shpresat e hapura

që shfaqen në lutjet e mbrëmjes

kur yjet shkëputen

nga vallja e akorduar

dhe treten

si shkreptima të humbura

në terrin e tmerrit

pa gjurmë ekzistimi…

2. Në këtë botë

të ndodhive të papritura

u hapën portat

e çudirave dhe rënieve të kota

dhe nuk u gjetë çelësi i shpëtimit

kotësive të kohës aktuale

të trashëguara

nga koha e rënieve totale

kur fluturat e erërave të reja

i mashtronte akulli rrëshqitës

me dritën e praruar

dhe zërin e zogjve të mbyllur

brenda rrethit magjik

për t’i shndërruar në pluhur hiri

mbi shtrojën e kuqe të mushkonjave

që ndërruan kostumin e defilimit

dhe mashtrimit…

Korrik, 2013

Sytё e hёnёs

Nё kёtё kohё tё pёshtjelluar

vёshtirё tё gjendesh brenda rrethit magjik,

aty ku hijet marrin trajta tё pakuptueshme

dhe nuk dёgjohet tik taku i sahat kullёs

qё vёshtron botёn e heshtur

nga streset e kohёs moderne…

Jeta nuk ёshtё ёndёrr

e ne knaqemi kur ёndёrrojmё

pёr njё çast, mrekullitё e papara,

sikur tё lindemi nё sytё e hёnёs

larg ulërimave

dhe rropatjeve tё shiut,

e xhami i krisur

nga vetёtima e vitit tё shkuar

mbetet shenjё kujtimi

pёr tё kuptuar se kjo forcё magjike

mund tё gjuaj

edhe në brendi të drurit tё kalbur,

aty ku fshehet gjarpri helmues

dhe misteret e çuditshme

qё na fryjnё zjarrin nё dritat e syve

duke shikuar ujёvarёn e imagjinuar

ёndёrr e trazuar

nga fёmijёria e hershme,

kur gjumi na merrte me rrёfimet

pёr historitё e tё parёve

qё ishin flijuar

për ta ndёrtuar

urёn e gurit

qё do t’i lidhte katёr anёt e botёs

dhe nёntё lumenjtё e dritёs

pёr ta pёrmbushur

amanetin e trashёguar

uratё e bekuar

dhe rrugё e gjatё

pёr tё udhёtuar…

Lexo më shumë

Nga arkivi: Grupit letrar “Jehona e Karadakut” (1974)

Një informacion për aktivitetet e Grupit letrar “Jehona e Karadakut”-Kumanovë, botuar në gazetën “FLAKA e Vëllazërimit” – Shkup, më 14.08.1974.
Këtë emër, që nga viti 1992 e mbanë Klubi letrar, i njohur si Klubi i Shkrimtarëve Shqiptarë të Kumanovës “Jehona e Karadakut”.
Kjo dëshmon për një traditë të pasur kulturore-letrare të këtij klubi.

Lexo më shumë

Klubi i Shkrimtarëve të Kumanovës, sjell dy botime të reja

Kumanovë, 18.10.2014 – Të shtunën në Qendrën për Kulturë në Kumanovë, në prani të një numri të madh të dashamirëve të fjalësartistike, Klubi i Shkrimtarëve “Jehona e Karadakut”, promovoi dy botimet e veta më të fundit. Bëhet fjalë për përmbledhjet poetike “Më shumë se Unë“ të autorit Selajdin Shabani, dhe “Sytë e Shqipërisë” të Fatos Rushitit.
Kryetari i klubit, Sevdail Demiri, tha se “me gjithë vështirësitë e natyrave të ndryshme, po mundohemi që herë-pas-here të sjellim nga një fllad kulturor në këto hapësira, ashtu siç janë edhe këto dy përmbledhje, që sot po i ofrohen publikut shqiptar”. Sipas Demirit, i cili foli edhe në cilësinë e redaktorit të librave, këto botime të reja të autorëve Shabani dhe Rushiti, dallohen cilësisht në realizimet e tyre artistike, për nga veçantitë që sjellin në letërsinë bashkëkohore shqipe, andaj vlejnë që të lexohen dhe komentohen kujdesshëm.
Më tej, për librin “Më shumë se Unë“ të autorit Selajdin Shabani, folën recensentët Fatos Rushiti dhe Ismail Ganiu, të cilët theksuan veçantinë e poezisë së Shabanit, e cila është një reflektim i drejtpërdrejtë i natyrës së tij të brendshme shpirtërore dhe artistike. “E gjithë poezia e tij, po aq sa ka mllef, ka dhe shpresë, po aq sa ka revoltë personale, ka dhe optimizëm për më tutje në jetë dhe në zhvillime shoqërore”, u shprehën recensentët.
Selajdin Shabani shkollën fillore dhe të mesme e ka mbaruar në Kumanovë, ndërsa Fakultetin Filologjik, dega Letërsi dhe Gjuhë Shqipe në Prishtinë. Për më shumë se një dekadë ka punuar gazetar nëpër disa media. Është autor i librave “Ndrydhje” (1999), “Mes stinëve të një gazetari” (2006), ”Përtej momentit” (2008), dhe i fundi ky që u promovua “Më shumë se Unë“.
Ndërsa, për veprën e Fatos Rushitit “Sytë e Shqipërisë”, recensenti Arben Ibrahimi, veç tjerash tha se, “autori nga përmbajtja e gamës së gjerë të poezive të shkruara, në bërthamën e tij artistike shpërfaqet si lirik i apostrofuar me një verifikacion që nuk përputhet shumë me traditën tonë letrare, ose me të ashtuquajturin varg popullor të përpunuar…”.
Autori Fatos Rushiti, shkollën fillore ka mbaruar në fshatin e lindjes Vaksincë, ndërsa Gjimnazin në Kumanovë. Është jurist i diplomuar dhe magjistër i shkencave juridike në Universitetin e Prishtinës, tani doktorant për Gjyqësinë Kushtetuese në Universitetin Evropian të Tiranës. Është autor i këtyre përmbledhjeve poetike: ”Aurora e jetës” (1999), “Në elirë” (2007), dhe “Sytë e Shqipërisë” (2014). Është fitues i disa çmimeve letrare.
Ndryshe, gjatë promovimit, aktori Enver Halimi dhe nxënësja Teuta Ahmeti, recituan disa poezi të autorëve, kurse profesori i muzikës, Besnik Avdili, ekzekutoi disa pika muzikore në violinë dhe piano.
Këto dy botime letrare janë mundësuar me ndihmën financiare të Ministrisë së Kulturës.

Lexo më shumë

Në nderim të poetit preshevar Qerim Arifi

Preshevë, 13.09.2014 – Prezantim i përfaqësuesve të KSH “Jehona e Karadakut” nga Kumanova, Sevdail Demiri e Burhanedin Xhemaili, në manifestimin letrar kushtuar poetit të ndjerë preshevar Qerim Arifi.
Në këtë manifestim u lexua edhe një recension lidhur me jetën dhe veprën e Qerim Arifit, përgatitur nga studiuesi kumanovar Dr. Nehas Sopaj.

Lexo më shumë

Mirënjohje në Gjilan për klubin “Jehona e Karadakut”

Gjilan, 21.06.2014 – Të shtunën, më 21 qershor 2014, në Grykën e Karadakut, respektivisht në fshatin Dunav, u mbajt edicioni i katërt i Manifestimit Rajonal të Poezisë “Trekëndëshi Poetik i Paqes”, nën përkujdesjen e kryetarit të Komunës së Gjilanit, Lutfi Haziri, dhe nën organizimin e Ars Klubit “Beqir Musliu” nga Gjilani.

Nikoqiri, Ars Klubi Beqir Musliu, ka ndarë dhe mirënjohjet për Klubet e shkrimtarëve nga “Jehona e Karadakut” nga Kumanova, “Feniks” nga Presheva dhe “Joniana” nga Saranda.
Kryetari i Klubit të Shkrimtarëve “Jehona e Karadakut” nga Kumanova, Sevdail Demiri, në emër të propozuesit, tha se Çmimi letrar “Beqir Musliu”, i cili sivjet po i ndahet shkrimtarit dhe studiuesit të njohur të letërsisë, Nehas Sopaj, është një nderim i madh që i bëhet jo vetëm se shkrimtarit si individ, familjes, vendlindjes apo rajonit prej nga vjen ai, por është një nderim i madh për mbarë letërsinë shqiptare, të cilën e përfaqëson denjësisht katër dekada me radhë.
Sopaj është fituesi i tetë me radhë i këtij çmimi, pas Ali Podrimjes, Sabri Hamitit, Musa Ramadanit, Visar Zhitit, Ibrahim Kadriut, Rexhep Qosjes e Ramadan Mehmetit…

Lexo më shumë

QAZIM SHEHU – Tiranë: “Tre gurë të shqipes”

(Vlerësim letrar për tre poetë të Kumanovës: Burhanedin Xhemali, Sevdail Demiri dhe Fatos Rushiti)

Tre poetët e Kumanovës janë tre gurë kilometrikë në këtë skaj të largët të trojeve etnike, tre emra që e vlejnë të diskutohen e të merren në konsideratë nga mediume letrare për peshën e kulluar të fjalës shqipe. Kanë të përbashkët dramacitetin e këtyre rojeve historike ku frymon fjala shqipe dhe pastërtia elegante e mikpritjes shqiptare e paprekur nga erërat e huaja, po kanë të veçantë secili fjalën e vet. Janë tre gurë kilometrikë po njëkohësisht tre gurë të çmuar në kurorën e trojeve shqiptare. Fatosin e njihja me kohë, ndërsa Burhanedinin dhe Sevdailin i njoha kur mora pjesë në takimin e shkëlqyer poetik të klubit “Jehona e Karadakut”. Edhe pse shkoja për herë të parë, m`u bë se kisha shkuar shpesh, natyrshëm brenda afërsisë që krijojnë vetiu poetët, po edhe nga thjeshtësia e tyre, rrezatimi i komunikimit të tyre brilant, mjedisi rrezatues i një fjale artistike, begenisja dhe afërsia e tyre e jashtëzakonshme.

BURHANEDIN XHEMALI

Burhanedini është një krijues serioz, i cili që moti e ka lëvruar poezinë, dramën prozën, tregimin dhe romanin. Pra, është një krijues kompleks, me një përvojë të mirë që ka ardhur gjithnjë duke e pasuruar fjalën dhe duke e mprehur shijen e saj. Në librin e fundit: ”Ëndrra zgjuar brenda syve” ai mbetet një poet i shqetësimit dhe vërshimit të ndjenjave pa iu larguar kauzës së etnisë.

Titulli i librit e mbart një simbolikë të hollë dhe shërben për pasurimin e imazheve që vijnë duke zgjeruar rrathët e tyre jo si rrathë danteskë po si rrezet e diellit. Në poezinë e tij folësi lirik e pasuron dhe tejçon në vibrime të holla shqetësimin etnopsikologjik, bëhet bartës dhe interpret i historisë, i vetes, ndërgjegjes kombëtare, po njëkohësisht edhe i spikamës lirike në ndjesi të holla. Vargu i tij i lirshëm u ngjan trandjeve të mëdha që paralajmërojnë shpërthime dhe dëshirë për një liri më të madhe.

Në këtë poezi shkrihen vizionet me njëra tjetrën dhe marrin formë e jetësohen shpresa të mëdha. Sepse poeti do thotë: ”Në këtë botë të pështjelluar,/vështirë të gjendesh brenda rrethit magjik../”.Siç do ta vejë re studiuesi Bilal Maliqi nga Presheva se kemi të bëjmë me një poet me imagjinatë të bujshme krijuese, unë do të shtoja se buja e imagjinatës përcillet rreth vlimeve shpirtërore të cilat klasifikohen natyrshëm brenda një mendimi të pjekur dhe një spontaniteti të këndshëm.

Teksa i lexon vargjet e Burhanedinit bindesh për efektin ngazëllyes të fjalës e cila konturon zërin e tij, profilin krijues të një autori që mban gjallë fjalën shqipe në këto troje jo thjesht si fjalë, po si fjalë që vjen dhe gjen nivelet e shprehjes autentike përmes dridhmës së shpirtit dhe thagmës krijuese, në paradigma vetanake.

Në poezinë e tij shprehet gjithnjë një ndjesi e kuptueshme larg sforcës dhe mashtrimit po brenda trillit kohor dhe hapësinor, pikërisht aty ku e ka vatrën ëndrra në sytë e zgjuar të shqiptarit, atëherë kur gjaku i dëshmorëve dhe i kohërave të reja me erë të mbarë hoqi klonet dhe ndalesat makabre të diktaturave shoviniste.

Nëntekstet kuptohen përmes një fjale të thjeshtë domethënëse plot kuptimësi dhe larmi të shpërhapjes së fjalës poetike. Burhanedin Xhemaili është një poet i çliruar nga çdo kompleks, i vërtetë si vetë vendlindja e tij zakonmirë, si vetë Kumanova e dashur brenda teatrit të një treve të përcaktuar për të vuajtur po edhe për të luftuar për të drejta natyrale.

Nga poezia e tij përftohet një afeksion i mirë, një ndjenjë që të mbush me shqiptarizëm që reflekton kohërat dhe individin me një etiketim të qartë. Në poezinë e tij ai u vë përballë hijeve diellin e zemrës shqiptare dhe hijet turfullojnë, por poeti i godet me shigjeta e mençurisë së vet prej një artisti të fjalës.

SEVDAIL DEMIRI

Sevdail Demiri aktualisht është kryetar i klubit letrar “Jehona e Karadakut”. Në pamjen e tij përzihen intelekti me brishtësinë e në djali evropian. Është nga ata djem që i përket të sotmes si premisë dhe ardhmërisë si siguri. Libri i tij me poezi: ”Kufiri i horrave” është libri i katërt. Po në librin e tij përzihet brishtësia me forcën, konkretja me përgjithësinë, thjeshtësia e fjalës me thellësinë e saj, poezia e tij rrjedh dhe ëmbëlson me pamjet e gjëra të identiteti ashtu si fushat e Kumanovës për të arritur lartësinë e maleve përreth. ”Në skaje të atdheut / ku damarët gjakosin pikën e fundit / shqiptarisht / era e lirisë vjen nga larg /dhe mbush me shpresë bronket e lirisë/”, shprehet ai në librin e tij të ri.

Vargje të tilla të bukura dhe mbresëlënëse ne mund të ndeshim në gjithë vëllimin e tij ku spikat ideja e lirisë dhe ndjenja e poetit që e rrethon atë me shprese që e çerdhëson atë. Për kënaqësi mund të vijojmë me vargje të tilla: ”Natë e gjatë në Karadak,/qyqet lozin mbi Gurin e Shqipes… / aty ku dikur kishte rrugë e parmak /sot ka veç thera dhe politikë të ditës…/”

E shohim në poezinë e Sevdailit që ai di të ndërtojë simbole me një mjeshtëri të hollë, simbole që marrin përfytyrime gjithëkohore e na krijojnë mundësi të meditojmë gjatë për to. Sevdaili e vendos fjalën në vendin e vet, jo duke e menduar po fjala tek ai vjen pas një mendimi të pjekur ndonëse është relativisht i ri.

Duke qenë me origjinë nga Depca e Karadakut të Preshevës-Gjilanit, ai e di mirë lojën tragjike me këto troje të vyera shqiptare, po kështu ai është i vetëdijesuar mbi gjuhën, sepse gjuha shqipe si një gjuhë e lashtë i mbajti këta njerëz të jenë konservativë në zakonet dhe porosinë e të parëve.

Poezia e tij i sjell dukshëm këto, me një prizëm ndjesor të hapur e të përthyer përmes kujtesës, ëndrrës, besimit, vlera të panjollosura të qenësisë. Poezia e Sevdailit ma solli që në leximin e parë këtë mendim, larg çdo konfrontimi të përkundërt, ajo mbetet një poezi e tonaliteteve të qeta ku flet gjithnjë arsyetimi dramatik i kohërave që ndërthuren përmes fatit historik të shqiptarit që jeton moçëm në këto troje.

Andaj edhe titulli “Kufiri i horrave” është një titull sa i zakonshëm aq edhe emblematik, një titull i cili shkon në hullinë e brengës e trimërimit për ta shembur atë. Vargjet e tij i qëndrojnë këtij tonaliteti imponues kur ai do shprehet: ”Kujtimin e vrarë për një kohë të trishtë,/ma lidh në fyt, më vret në gurmaz…/”.

Poezia e Sevdailit thuret bukur, thjesht e me hove djaloshare, ajo është krejtësisht e tij, larg çdo ndikimi apo ngjashmërie, mbetet një poezi e deduksionit, që vjen aty për aty, përmes detajit zbërthyes të kohës dhe individit.

Është një lloj poezie e cila mbrun liri, prosperitet, besim në ecje, është poezia e një poeti të Kumanovës që injekton shpresë e muzikon një ndjenjë të besueshme grimcuar nga një ajër i pastër lirie. Si poezi e nivelit të mirë artistik ajo e identifikon autorin kërkues ndaj fjalës poetike, po ku fjala poetike nuk merret me zhbirime të një meditacioni shterp, përkundrazi ajo përvijon mundësitë e depërtimeve në një botë sa konkrete aq virtuale etnopsikologjike.

Ashtu si Burhanedini, ai ia përkushton fjalën e vet poetike një populli të tërë, fatit të tij kolektiv duke e ndjerë veten jo thjeshtë si pjesë soditëse po të njëjtësuar. Kështu kuptohet tek ky poet një mision njerëzor, jashtë retorikës bërtitëse apo patetikës së thatë që do të kumbojë përmes sloganit. Poezia e tij edhe kur kap tema dhe motive intime i thur himn lirisë dhe bukurisë njerëzore, duke mbetur kështu një poezi e rrjedhshme plot finesë dhe veçanti.

FATOS RUSHITI

Fatos Rushiti është një poet me metafizikë të zhvilluar, e gjithë poezia e tij, thënë edhe herë tjetër, e mbart qenien njerëzore në përmasat e një dashurie të vrullshme, dashuri për femrën dhe të bukurën estetike. Ai është një poet që e kërkon dimensionin e lirisë së qenies në modernitetin e shprehjes duke i thyer imazhet në qëllime të largëta dhe njëkohësisht duke na afruar një botë sa të largët aq edhe të prekshme. Fjala poetike e Rushitit ngulitet përmes thënieve të mençura plot kumbime dhe befasira të këndshme.

Ka botuar vëllimin “Në Elirë” dhe ka në proces dy vëllime të tjera. Aktualisht punon dhe vepron në Kumanovë, por është një poet i gjithëgjendshëm dhe me njohje ndër poetë të tjerë. Poezia e Rushitit ka bërë shumë miq sepse vetë vargu i tij afron dhe shpreh imazhe të një dashurie dhe mundimi të thukët.

Nëse poezia e Sevdailit dhe Burhanedinit është më afër trollit, poezia e Fatosit e shpreh ankthin e trollit në një prirje që zgjerohet në kuptimet ekzistenciale të individit në tërësi. Kështu ai shënjon fakte dhe trillon rreth tyre duke iu qasur bukurisë fizike të femrës po edhe përjetimeve trullosëse të kësaj bukurie, duke kërkuar kuptime që rrjedhin përmes arsyetimeve që diskordohen në një shfaqje të lirë të imazheve rrjedhëse.

Fatosi plotëson dy të parët ashtu si edhe dy të parët mëvetësohen nga njëri tjetri duke sjellë një pasurim vlerash motivore po edhe teknike të të shprehurit poetik në letërsinë shqipe të Kumanovës.

Njohja me poetët e Kumanovës është një befasi e këndshme dhe përherë e merituar për ta zgjeruar këtë njohje, për të rritur sa më shumë të jetë e mundur intensitetin e ndërkëmbimit të mesazheve të fjalës në këtë kohë shpejtësish, ku komoditeti i arritjes i skualifikon distancat e mallit dhe keqkuptimet. Po, njohja me ta, përcjell edhe një brengë të natyrshme, kur kujtojmë trojet tona ende të ndara e që atje mbahen ende nga rrënjët e fjalës shqipe.

Komuniteti i shkrimtarëve të Kumanovës me përpjekje e organizon një manifestim letrar shembull sakrifice dhe dashurie, shembull integrimi brendashqiptar, gjë të cilat nuk e bëjnë qendra më të rëndësishme të trojeve tona etnike. Por po të mos jenë këta poetë – në mungesë të informacionit, të tjerë i njoh pak – vështirë se do të bëhej ky manifestim, ku gurgullon fjala e ngrohtë, nervi i fjalës poetike me atmosferë miqësie e dashurie. Dhe, këta tre poetë rrinë si tre sogjetarë tek Guri i Shqipes, ata me fjalën e tyre na mësojnë, sot e gjithë ditën, se vetëm trimëria guximi, atdhedashuria e përpjekja e vazhdueshme për të mos humbur identitetin e bëjnë poetin poet. Dhe identiteti nuk humb në një trevë me rrënjë të lashta në histori…

*Botuar në: Zemra shqiptare, Lajm, Aktuale, etj.

Lexo më shumë

“Takimet Poetike të Karadakut 2014”, fitues Memeti, Rashkaj dhe Gjergji

Kumanovë, 12.03.2014 – Të martën në mbrëmje më 11 mars, në Kumanovë u mbajt edicioni i 22-të me radhë i manifestimit tradicional kulturor-letrar “Takimet Poetike të Karadakut 2014”. Me këtë aktivitet, Klubi i shkrimtarëve shqiptarë ‘Jehona e Karadakut’ nga Kumanova, me gjithë vështirësitë e sferave të ndryshme, po e vazhdon traditën e vet dhjetëravjeçare, për të shfaqur dhe prezantuar vlerat shpirtërore, artistike dhe kulturore të kësaj ane, përmes artit të bukur poetik.
Në manifestimin e sivjetshëm morën pjesë shumë poetë të njohur nga të gjitha trevat shqiptare, si Tirana, Prishtina, Shkupi, Gjirokastra, Mitrovica, Prizreni, Viti, Gjilani, Presheva, Bujanoci, Medvegja, Tetova, Kumanova, etj.
Kryetari i Klubit të Shkrimtarëve të Kumanovës, Sevdail Demiri, tha se ‘Jehona e Karadakut’ është një emër që daton 40 vjet më parë, pra në vitin 1974, kur në kuadër të gjimnazit të Kumanovës, një grup profesorësh dhe nxënësish të talentuar në fushën e letërsisë, formuan grupin letrar me këtë emër. “Në fillet e pluralizmit, në vitin 1991, disa artdashës, të gdhendur me idenë fisnike të zhvillimit e përparimit kulturor të kësaj shoqërie, themeluan Klubin e Shkrimtarëve Shqiptarë të Kumanovës ‘Jehona e Karadakut’. Në krye të klubit u vu shkrimtari Fadil Bekteshi, për të renditur më pas një varg veprash dhe suksesesh. U themelua revista e parë e pavarur shqiptare në Maqedoni për art, shkencë dhe kulturë “Doruntina”, dhe prej atëherë e deri më sot janë botuar dhjetëra e qindra libra mjaft me vlerë nga anëtarët e klubit”, tha Demiri.
Në hyrje të Orës së madhe letrare, aktivisti dhe poeti Rexhep Abazi, solli me fyell tingujt e Medvegjës. Më pas, poeti dhe studiuesi i letërsisë, Nehas Sopaj, shpalli të hapura “Takimet Poetike të Karadakut 2014”, që më pas të paraqiten me poezitë e tyre: Qazim Shehu, Hysen Këqiku, Avni Dehari, Kozeta Zavalani, Bejtush Memeti, Shefqete Gosalci, Demir Gjergji, Flora Peci, Rexhep Abazi, Qazim Muska, Sarë Gjergji, Rrahim Ganiu, Ismail Baftjari, Drita Nikoliqi–Binaj, Bilall Maliqi, Nazmi Beqiri, Ali Qerimi, Nehat Ramizi, Arben Rashkaj, Sadije Aliti, Fadil Curri, Burhanedin Xhemaili, Ismail Bilalli, Sunaj Raimi, Demush Berisha, Shezair Koko, Ismail Ganiu, Rexhep Bajrami, Fatos Rushiti, Selajdin Shabani, Mahir Ademi, Arsim Jonuzi dhe Saranda Halili.
Juria letrare, e përbërë nga Qazim Shehu, Shefqete Gosalci dhe Fatos Rushiti, ndau çmimet letrare “Fadil Bekteshi”, me emrin e kryetarit të parë të Klubit të Shkrimtarëve “Jehona e Karadakut”. Në mesin e shumë poezive të suksesshme, çmimi i parë iu nda poetit Bejtush Memeti nga Kumanova, çmimi i dytë poetit Arben Rashkaj nga Prizreni dhe çmimi i tretë poetit Demir Gjergji nga Tirana.
Në kuadër të manifestimit, u promovuan edhe botimet e reja të anëtarëve të Klubit të shkrimtarëve shqiptarë të Kumanovës: Nazmi Beqiri (“Drejt përjetësisë”), Burhanedin Xhemaili (“Ëndrra e zgjuar brenda syve”) dhe Sevdail Demiri (“Kufiri i horrave”). Për këto libra folën recensentët dhe u lexuan pjesë të librave nga aktori dhe poeti Ali Qerimi.
Manifestimi “Takimet Poetike të Karadakut”, daton që nga marsi i vitit 1992, në kujtim të demonstratave të rinisë studentore të 1981-shit në Kosovë dhe gjithë dëshmorëve të kombit.Nga Shërbimi për informim

Lexo më shumë

Shënimi i 40 vjetorit të veprimtarisë letrare të Nehas Sopajt

Kumanovë, 06.12.2013 – Sot në Kumanovë, në organizim të Klubit të Shkrimtarëve “Jehona e Karadakut”, para një numri të madh të dashamirëve të artit, letërsisë dhe kulturës shqiptare, u shënua 40 vjetori i botimit të veprave të para letrare të autorit Nehas Sopaj. Bëhet fjalë për përmbledhjet poetike “Këngët e blerta” në Shkup dhe “Algjet” në Prishtinë (1973), të cilat u vlerësuan lartë nga kritika letrare e kohës, duke u prezantuar nëpër antologji të ndryshme të poezisë në vend dhe jashtë.
Fillimisht, kryetari i klubit, Sevdail Demiri, theksoi se Nehas Sopaj është një nga emrat më të veçantë të letërsisë shqipe, i cili gjatë këtyre 40 viteve të veprimtarisë letrare, na ka ofruar rreth 40 tituj të veprave nga zhanre të ndryshme, duke filluar nga poezia, tregimet, novelat, romanet, përkthimet, librat shkollore dhe studime letrare.
Poeti Fatos Rushiti, para publikut lexoi biografinë e autorit dhe deklamoi vargje nga poezia e zgjedhur bashkëkohore e Sopajt.
Më tej, shkrimtari Burhanedin Xhemaili, paraqiti një vështrim kritik më të hollësishëm për veprat letrare të Nehas Sopajt. “Autori me tërë këtë opus letrar dhe me këto përzgjedhje shënon kulmin e arritjes estetike në vlerat e poezisë shqipe në përgjithësi, dhe në krijimin e individualitetit të tij letrar në veçanti, si botë poetike më vete që dallon prej krijuesve të tjerë të afirmuar”, u shpreh Xhemaili.
Më pas, autori Nehas Sopaj, shprehu falënderimet e tij për nderimin e bërë, duke rikujtuar kohën kur si 19 vjeçar kishte shpërthyer bota e tij artistike, me botimin e dy përmbledhjeve të lartpërmendura, të cilat atë e kishin radhitur në mesin e poetëve më premtues të kohës.
Në emër të kryesisë së Klubit të Shkrimtarëve “Jehona e Karadakut” nga Kumanova, kryetari Sevdail Demiri, ndau Mirënjohje për Prof.Dr. Nehas Sopaj, poet, shkrimtar, pedagog e studiues i letërsisë, me rastin e 40 vjetorit të botimit të veprave të para autoriale.
Manifestimin e përshëndeti edhe shkrimtari nga Shkupi Fadil Curri, i cili e vlerësoi lartë veprën letrare të Sopajt, duke i uruar shëndet dhe jetë të gjatë, me dëshirën që edhe shumë vepra tjera letrare dhe shkencore t’ia dhurojë letërsisë shqiptare.

Shërbimi për informim

Lexo më shumë

Shpallen fituesit e konkursit letrar në poezi

Kumanovë, 23.11.2013 – Sot në lokalet e Gjimnazit “Sami Frashëri” në Kumanovë, u bë shpallja publike e rezultateve të konkursit letrar në poezi, i shpallur një muaj më parë për nxënësit e shkollave të mesme shqipe të rajonit të Kumanovës.
Juria letrare e Klubit të Shkrimtarëve “Jehona e Karadakut”-Kumanovë, e formuar për realizimin e këtij konkursi me temë të lirë, në përbërje: Fatos Rushiti, Bejtush Memeti dhe Burhanedin Xhemaili, pas leximit të kujdesshëm të të gjitha poezive të arritura në postën elektronike të klubit, ishin përcaktuar për këto tre punime si më të mira:
Vendi i parë: Arta Selmani, nxënëse e Gjimnazit “Sami Frashëri”-Kumanovë, për poezinë “28 Nëntori”;
Vendi i dytë: Shukrane Junuzi, nxënëse e SHMK “Ismet Jashari”-Likovë, për poezinë “Bonjaku i tij”; dhe
Vendi i tretë: Kujtesa Xheladini, nxënëse e SHMTK “Nace Bugjoni”-Kumanovë, për poezinë “Të vdekur, por të gjallë”.
Juria vlerësoi se më tepër punime për këtë konkurs, si në numër, poashtu edhe në cilësi, kishte nga nxënësit e Gjimnazit “Sami Frashëri”.
Shpërblimet në vlerë 7000 denarë, 5000 denarë dhe 3000 denarë, mirënjohjet dhe librat, u ndanë nga ana e kryetarit të Klubit të Shkrimtarëve, “Jehona e Karadakut”-Kumanovë, dr. Sevdail Demiri. Poashtu, mirënjohje morën edhe shkollat të cilat ndihmuan në realizimin e aktivitetit.
Ky ishte viti i parë që u realizua me sukses ky konkurs letrar, i mbështetur nga komuna e Kumanovës. Konkursi në fjalë, në të ardhmen synon të bëhet tradicional, për të nxitur dhe motivuar gjeneratat e reja të merren më tepër me aktivitete letrare-artistike dhe kulturore.

Nga komisioni për informim

Poezia që zuri vendin e parë (I)

28 NËNTORI

Shqipëri po të qesh fytyra,
Një vranësirë ke në vetull
Shqiponjës në flamur i buzëqesh liria,
Trupi i copëtuar, dhembje e mbetur.

Heeej! Shqipëri nënë e plagosur
Ty që të parin Zoti të solli në tokë,
Kaluan shekuj në këtë botë të pluhurosur
Prapë gjallë ke ngel dhe je bërë e fortë.

28 Nëntor shkruar me shkronja gjaku
Shkruar me shkronja qe tokës ia dhuroi Zoti
Çdo shkronjë me aromë zambaku
Çdo shkronjë e larë me pika loti.

Gjithmonë Shqipëri ty të kanë munduar
Që bijtë të jenë në sherr dhe të përçarë
Me asnjë fe dot nuk të kanë ngatërruar
Sepse ti gjithmonë ke dalë e larë.

E di Shqipëri vranësirën ke në vetull
Shumë shpejtë vranësira ka me t’u tretur
Shumë shpejt dy plagët do të shërohen,
Shqiptarët bashke në një shtet do të bashkohen.

ARTA SELMANI,
Kl.l-8, Gjimnazi “Sami Frashëri”-Kumanovë

Poezia që zuri vendin e dytë (II)

BONJAKU I TIJ

Si qëndron loti në syrin tim
pyete vetëm shpirtin tim.
Si më ngrinë gjaku në venë
kur kujtoj atë që s’vjen.

Babi im i dashur
unë s’u ngopa me ty
por ngopem me erën tënde
që e thërras liri.

Si s’u erdhi keq atyre
si s’menduan për mua
që unë sot të rroj vetëm
s’më bjen në krah asnjë mua.

Unë po rritem ngadalë
do bëhem trim si ti
ti quhesh legjendë
kurse unë i biri i tij.

SHUKRANE JUNUZI
SHMK “Ismet Jashari”-Likovë

Poezia që zuri vendin e tretë (III)

TË VDEKUR, POR TË GJALLË

Nga mosqenia e të gjallëve në këtë botë
Ne kuptojmë si ende rrojmë në këtë tokë,
Në këtë tokë me gjak të shtruar
Që të duket si e praruar.

Nga kjo tokë erdhën
E në të shkuan,
Por të gjallë mbetën,
as nga dheu nuk u tretën.

Anëpëranë Arbnisë dëgjohej
Për liri kushtrimi,
Nga të gjallët e pavdekshëm
Pa ju trembur syri.

Në këtë tokë arbnore rrojmë
Se për të u flijuam,
Me djersë e me shpirt,
Popullin arbnor për ta ndrit.

KUJTESË XHELADINI
Kl. IV-7, SHMTK “Nace Bugjoni”-Kumanovë

Lexo më shumë

Çmimi letrar “AGIM RAMADANI” në Stubëll të Epërme të Kosovës

Më 21 shtator 2013 në Stubëll e Epërme të Vitisë (Kosovë), u mbajt manifestimit tradicional kulturor e shkencor mbarëkombëtar “Takimet e Dom Mikelit” (edicioni i XXIV), në organizim të Shoqatës Kulturore Shkencore nga Stublla dhe Qendra për Studime Albanologjike në Tiranë.
Në kuadër të Orës së madhe letrare “Agim Ramadani”, ku u paraqitën afër 40 poetë nga të gjitha trevat shqiptare, çmimi i tretë i takoi Sevdail Demirit nga Kumanova, vendi i dytë poetes Shefqete Gosalci nga Prishtina, ndërsa çmimi i parë poetit Abdullah Konushevci nga Prishtina.
Juria ishte e përbërë nga studiuesit Sadri Fetiu, Nuhi Ismajli dhe Fehmi Ajvazi.
Përpos Sevdail Demirit, nga Klubi i Shkrimtarëve “Jehona e Karadakut”-Kumanovë, në këtë manifestim morën pjesë edhe poetët: Bejtush Memeti, Burhanedin Xhemaili dhe Fatos Rushiti…

Lexo më shumë

Postimet popullore

Njoftim rreth manifestimit “Takimet Poetike të Karadakut -2018” (1,285)

Konkurs për manifestimin interdiciplinar “PENA IME - МОЕТО ПЕРО - MY PEN“ , al/mk (1,214)

Shpallje - konkurrimi për pjesëmarrje në “Takimet Poetike të Karadakut -2018” (1,143)

Festa e poezisë karadakiane në Kumanovë e Likovë (1,116)

Programi dhe lista e pjesëmarrësve të manifestimit “PENA IME - МОЕТО ПЕРО - MY PEN“ (1,011)

Kategori: Ballina