Kumanovë, 10.3.2019 – Edicioni i XXVII-të i manifestimit tradicional kulturor-letrar “Takimet Poetike të Karadakut – 2019”, sot nisi me tryezën shkencore kushtuar “110-vjetorit të Klubit Shqiptar të Kumanovës” dhe themeluesit të saj Jashar Erebara.

Referuesit prof. dr. Avzi Mustafa dhe shkrimtarja e publicistja Mimoza Erebara nga Tirana, sollën të dhëna të thukta dhe mjaft me interes për këtë temë, e cila përmendet me pietet gjithmonë kur bëhet fjalë për shkëndijat e para të arsimit dhe kulturës shqiptare në Kumanovë.

Një nga konkluzionet e tryezës ishte që zyrtarisht të bëhet kërkesë deri te organet komunale të Komunës së Kumanovës, që një shkollë, qendër kulturore-arsimore apo rrugë a bulevard i qytetit, të marrë emrin Jashar Erebara.

Në pjesën e debatit morën pjesë aktive shumë kumanovarë, si Etem Xheladini, Ismet Bexheti, Nazmi Beqiri, Bejtush Memeti, Ismail Ganiu, Sunaj Raimi, Osama Muadini, Qani Haliti, Arben Ibrahimi, etj.), të cilët theksuan rëndësinë e rivlerësimit të rolit të Klubit të Kumanovës dhe iluministit të madh Jashar Erebara.    

Manifestimi vazhdon sot (e hënë, 11 mars 2019), prej ora 18:00, në sallën e Shtëpisë së Zejtarëve në qendër të qytetit, ku do të mbahet Ora e Madhe Letrare, me poetë nga të gjitha trojet shqiptare.

Manifestimi i 11 marsit mbahet tradicionalisht në Kumanovë, në shenjë kujtimi dhe nderimi të demonstratave të rinisë studentore të vitit 1981 për lirinë dhe pavarësinë e Kosovës.

Edicioni i XXVII-të i manifestimit tradicional 

 “TAKIMET POETIKE TË KARADAKUT – 2019”

P r o g r a m i :

TRYEZA SHKENCORE:

“110-vjetori i Klubit Shqiptar të Kumanovës”

Referojnë: Avzi Mustafa (Shkup) dhe Mimoza Erebara (Tiranë)

Data: 10.03.2019 (e diel), ora 15:00

Vendi: Salla e vogël e Komunës së Kumanovës (ish-Komiteti)

~ ~ ~

ORA E MADHE LETRARE (me poetë nga mbarë trojet shqiptare)

Data: 11.03.2019 (e hënë), ora 18:00

Vendi: Salla e Shtëpisë së Zejtarëve (Sheshi i Kumanovës)

Pjesëmarrja juaj e begaton manifestimin tonë…

Me respekt,

                             Kryesia e KSH “Jehona e Karadakut” – Kumanovë

Kumanovë, 30.11.2018 – Në këtë nëntor festimesh anembanë trojeve shqiptare, sot u mblodhëm në Kumanovë, për të kujtuar kryeheroin tonë kombëtar Gjergj Kastrioti Skënderbeu, përmes një eventi të veçantë.
Veprimtari i shquar i çështjes kombëtare, shkrimtari dhe bashkëvendasi ynë, Avni Dehari, përmes penës së tij, na e solli Skënderbeun në një trajtë krejt tjetër – përmes trilogjisë së titulluar “Gjergjat në drita përkrenaresh”, ku bëjnë pjesë romanet për fëmijë: “Dragoi“, “Udhëkryqi” dhe “Flakadanët e lirisë“, botuar nga Shtëpia Botuese “Orfeu” në Prishtinë.
Për veprat folën:
-Shkrimtari dhe teoricieni i letërsisë, dr. Nehas Sopaj;
-Shkrimtari nga Kosova, miku i Kumanovës, z. Nebih Bunjaku;
-Shkrimtari nga Kosova, redaktor dhe botues, z.Rushit Ramabaja;
-Autori prof. Avni Dehari.
Në cilësinë e bashkëorganizatorëve të promovimit, Klubi i Shkrimtarëve “Jehona e Karadakut” (Sevdail Demiri – kryetar), dhe Shtëpia Botuese “Idriz Seferi” (Sevim Ahmeti – drejtor), i ndanë mirënjohje prof. Avni Deharit, për kontributin e dhënë në procese të rëndësishme të historisë sonë kombëtare, dhe në zhvillimin e arsimit, gjuhës, letërsisë dhe librit shqip.
Kori komunal i Komunës së Likovës “Zejadin Ismaili”, nën udhëheqjen e Florim Zulfiut, në hyrje interpretoi Himnin e flamurit, ndërsa në mbyllje këngën premierë kushtuar heroit të kombit, Ismet Jashari – Komandant Kumanova, me titull “Flamur me emër”.

Në këtë edicion të parë të festivalit “Pena ime”, Syhana Reçi nga Struga, u shpall fituese e “Penës  së artë për muzikë”, me veprën e Shumanit “Adagio & Allegro” op.70, ekzekutuar me violë…

Kumanovë, 22.6.2018 – Një freski të re muzikore me tinguj të jashtëzakonshëm të muzikës klasike, sollën para publikut kumanovar, artistët e rinj nga vende të ndryshme të Maqedonisë, në kuadër të natës së tretë të manifestimit interdisiplinar “Pena ime”, nën organizimin e Klubit të Shkrimtarëve “Jehona e Karadakut” nga Kumanova.

Emra të njohur të muzikologjisë shqiptare, si Sihana Badivuku, Blerim Grubi e Besjana Mehmeti, në cilësinë e jurisë profesionale, çmuan lartë performimin e artistëve të rinj, të cilët gjithnjë e më tepër po ngjiten lartë shkallëve të muzikës.

Në këtë edicion të parë të festivalit “Pena ime”, Syhana Reçi nga Struga, u shpall fituese e “Penës  së artë për muzikë”, me veprën e Shumanit “Adagio & Allegro” op.70, ekzekutuar me violë. Me vendin e dytë u nderua artisti kumanovar Ismet Vejseli, i cili me zërin e tij të jashtëzakonshëm, interpretoi dy vepra klasike në solo-këndim (kanto). Kurse, vendi i tretë i takoi flautistes nga Tetova, Teuta Emini, me një ekzekutim po ashtu mjaft mbresëlënës. Artistët e rinj me piano i përcolli mjeshtri Shkëlzen Baftiari, kurse u prezantuan shkëlqyeshëm nga përgjegjësja e sferës së muzikës së këtij festivali, Funda Ali, e cila ishte edhe në cilësinë e moderatores.

Këtë koncert me karakter garues, e nderoi me pjesëmarrjen e tij, edhe ministri i Arsimit dhe Shkencës, Arbër Ademi, i cili para muzicientëve të rinj solli edhe lajmin e mirë, për mundësinë që e ofron MASH-i në subvencionimin të tyre në blerjen e instrumenteve muzikore.

Drejtori i manifestimit, Fatos Rushiti, theksoi se përmes këtij aktiviteti, synojmë të instalojmë vlera të reja në këtë mjedis, dhe tendencat janë që vitin e ardhshëm, ky manifestim të merr përmasa ndërkombëtare.

Në përmbyllje të gjithë aktivitetit treditor, kryetari i Klubit të Shkrimtarëve “Jehona e Karadakut” nga Kumanova, Sevdail Demiri, u shpreh i kënaqur nga realizimi i projektit, i cili kishte nxitur talentet e reja që të shfaqin afinitetet e tyre artistike në tri fusha specifike, siç janë arti figurativ, arti letrar dhe arti muzikor. Prandaj, theksoi nevojën që ky aktivitet të instalohet si manifestim i përvitshëm tradicional, përmes të cilit njerëzit do të mendojnë më shumë për Kumanovën e artit dhe kulturës, se sa për epitete të zeza që objektivisht nuk i takojnë fare.   

Ndryshe, manifestimi “Pena ime”, filloi më 20 qershor 2018, me ekspozitën kolektive artistike në Galerinë e Arteve në Kumanovë, dhe vazhdoi në netët vijuese me festivalin e poezisë, dhe me atë të muzikës klasike. Përpos karakterit garues, ky manifestim më tepër kishte për qëllim që të afrojë mes vete artistët e rinj dhe të nxisë përsosjen e tyre artistike në fusha të caktuara, duke ndërthur mes vete më shumë sfera.  

Manifestimi “Pena ime”, është mbështetur nga Ministria e Kulturës e Republikës së Maqedonisë.

-Të enjten (21 qershor 2018), vazhdoi nata e dytë e manifestimit “Pena ime”, nën organizimin e Klubit të Shkrimtarëve “Jehona e Karadakut” – Kumanovë, e cila ishte e rezervuar për poezinë.

Defiluan dhjetëra poetë nga vende të ndryshme të Maqedonisë, të cilët me krijimet e tyre më të reja artistike, i dhanë imazh të ri mbrëmjes.

Juria profesionale, në përbërje: Salajdin Salihu, Ahmet Selmani dhe Sunaj Raimi, kishin vendosur që tre vendet e para t’ua ndajnë poetëve: Daim Miftari nga Gostivari (“Pena e artë për poezi” – Vendi i Parë), Kreshnik Sopaj nga Kumanova (“Pena e artë për poezi” – Vendi i Dytë), dhe Arlind Farizi nga Tetova (“Pena e artë për poezi” – Vendi i Tretë), kurse çmimin inkurajues – poetit të ri kumanovar, Epirot Ferati.

Drejtuesi i manifestimit Fatos Rushiti dhe sekretari i klubit, Selajdin Shabani, theksuan nevojën e mbajtjes së këtij festivali poetik, i cili mëton të jetë tradicional dhe të instalojë standard të ri krijues në këto hapësira.

Festivalin e përshëndeti edhe kryetari i Komunës së Likovës, z.Erkan Arifi, si një mbështetës permanent dhe inkurajues i të gjitha zhvillimeve kulturore në këtë trevë.  

Festivali u zbukurua me muzikën e përzgjedhur nga artistja e re Funda Ali, dhe zëri i këndshëm i Ismet Vjeselit, ndërsa ambienti u zbukurua me punimet figurative, nën kujdesin e Hanife Islamit.

Edicioni i parë i manifestimit kulturor interdisiplinar “Pena ime” në Kumanovë, filloi më 20 qershor 2018 me hapjen e ekspozitës kolektive të 23 artistëve. Hapjen e manifestimit e bëri ministri i Kulturës, Asaf Ademi.

Në natën e tretë dhe të fundit të këtij manifestimi, (e premte, ora 19:30, te Shtëpia e Kulturës në Kumanovë), në program është muzika klasike, ku artistët e rinj do të performojnë vepra të papërsëritshme.

Kumanovë, 20.6.2019 –  Të mërkurën në Kumanovë filloi edicioni i parë i manifestimit kulturor “Pena ime” në Kumanovë, nën organizimin e Klubit të Shkrimtarëve “Jehona e Karadakut”.

Drejtori i manifestimit, Fatos Rushiti, tha se përmes festivalit “Pena ime”, synojmë t’i sfidojmë artistët, e sidomos ata të gjeneratave më të reja, që të tregojnë vlerat e tyre të pashprehura. “Në konkursin e shpallur për në sferës e artit figurativ, letrar dhe muzikor, pati qindra aplikime, gjë që dëshmoi se për një manifestim të tillë interdisiplinar në Kumanovë, vërtetë pati nevojë!”, u shpreh Rushiti.

Në hapje të ekspozitës, si aktivitet i parë i këtij projekti interdisciplinar, morën pjesë shumë artistë dhe artdashës. Manifestimin e shpalli të hapur ministri i Kulturës i Republikës së Maqedonisë, Asaf Ademi, i cili theksoi nevojën e mbështetjes së aktiviteteve të tilla kulturore, të cilat nxisin konkurrencën pozitive në mes artistëve dhe shtojnë vlerat e tyre artistike.  

Ndryshe, në konkursin e artit figurativ u paraqitën gjithsej 23 artistë nga qytete të ndryshme të Maqedonisë, si nga Shkupi, Tetova, Gostivari, Ohri dhe Kumanova.  Në këtë ekspozitë janë përfshirë piktura, grafika dhe skulptura. “Idetë që i preokupojnë artistit e rinj janë ti ndryshme dhe varirojnë nga realja, abstraktja, ekspresionizmi dhe hiper-realizmi. Janë artistë që pretendojnë ta ruajnë vlerën e mirëfilltë artistike si dhe origjinalitetin e shprehjes së tyre”, tha piktori akademik Rexhai Hyseni-Xhai.

Juria kishte vendosur që “Pena e artë për pikturë”, t’i takojë autores Afërdita Kiki, për pikturën “Pa titull”, e punuar në teknikën akril në pëlhurë; “Pena e artë për grafikë”, iu nda Naim Idrizit, për grafikën me titull “Saksofonist”, punuar në akualintë; dhe “Pena e artë për skulpturë” iu nda Ardian Kadriut, për skulpturën me titull “Gorgu”, punuar me gips të patinuar.

Manifestimi vazhdon të enjten (21 qershor 2018) me festivalin e poezisë dhe të premten (22 qershor 2018) me eventin kushtuar muzikës. Në këto dy net, ngjarjet zhvendosen në Shtëpinë e Kulturës në Kumanovë, me fillim në ora 19:30.